आज नेपाली जनताले विवेक प्रयोग गर्ने दिन

आजको दिन नेपाली लोकतन्त्रका लागि अत्यन्त महत्वपूर्ण क्षण हो। यो केवल प्रतिनिधि चयन गर्ने औपचारिक प्रक्रिया मात्र होइन, बरु देशको आगामी दिशा र गन्तव्य निर्धारण गर्ने ऐतिहासिक अवसर पनि हो। दस बर्षे महान जनयुद्ध, लामो संघर्ष, जनआन्दोलन र बलिदानबाट प्राप्त अधिकार प्रयोग गर्ने यही दिनमा प्रत्येक मतदाताको हातमा देशको भविष्य कोर्ने जिम्मेवारी आएको छ। मतपेटिकामा खसालिने एउटा मतले मात्र उम्मेदवारको जित–हार तय गर्दैन, यसले शासनको चरित्र, विकासको मार्ग र लोकतन्त्रको स्तर पनि निर्धारण गर्छ।

निर्वाचनका बेला भावनात्मक नाराबाजी, दलीय प्रभाव र विभिन्न प्रकारका प्रलोभनले मतदातालाई प्रभावित पार्ने प्रयास हुनु अस्वाभाविक होइन। तर लोकतन्त्रको वास्तविक शक्ति भनेको नागरिकको विवेकपूर्ण निर्णयमा निहित हुन्छ।

आज मत हाल्दा कुनै दल, व्यक्ति वा क्षणिक लाभभन्दा माथि उठेर उम्मेदवारको क्षमता, इमानदारी, जनप्रतिबद्धता र विगतको कामलाई आधार बनाउनु आवश्यक छ। भावनाभन्दा विवेक बलियो हुँदा मात्र सही नेतृत्वको चयन सम्भव हुन्छ।

लोकतन्त्रको अर्को महत्वपूर्ण पक्ष भनेको मतदाताको स्वतन्त्रता हो। डर, धम्की, दबाब वा आर्थिक प्रलोभनको प्रभावमा परेको मतदानले लोकतन्त्रलाई कमजोर बनाउँछ। “मेरो एउटा मतले के फरक पर्छ र?” भन्ने सोच पनि त्यत्तिकै घातक छ। इतिहासले पटक–पटक प्रमाणित गरेको छ—एक–एक मतले नै परिवर्तनको दिशा तय गर्न सक्छ। त्यसैले मतको गरिमा जोगाउनु प्रत्येक नागरिकको जिम्मेवारी हो।

विशेषगरी युवा पुस्ताको भूमिका आजको दिनमा अझ महत्वपूर्ण छ। परिवर्तनको चर्चा गर्ने, सामाजिक सञ्जालमा बहस गर्ने तर मतदानमा सहभागी नहुने प्रवृत्तिले लोकतन्त्रलाई बलियो बनाउँदैन। युवाले आफ्नो चेतना, ऊर्जा र जिम्मेवारीलाई मतदान केन्द्रसम्म पुर्‍याउनु आवश्यक छ। देशको भविष्यप्रति चिन्ता गर्ने प्रत्येक सचेत नागरिकले आज आफ्नो अधिकार प्रयोग गर्नुपर्छ।

निर्वाचन वास्तवमा नागरिकको मौन तर शक्तिशाली निर्णय हो। आजको विवेकपूर्ण मतदानले स्थिर, जिम्मेवार र जनउत्तरदायी शासनको आधार तयार पार्न सक्छ। त्यसैले आजको दिनलाई केवल औपचारिक प्रक्रिया नठानी लोकतन्त्रप्रतिको जिम्मेवारीका रूपमा लिँदै सबैले विवेक प्रयोग गरेर मतदान गरौँ। यही निर्णयले भोलिको नेपालको मार्ग तय गर्नेछ।