बागमती किनारमा बगिरहेका आँसुले कसरी नेपाल हाँसिरहेको देखिन्छ ? : प्रदीप ज्ञवाली

काठमाडौँ । नेकपा एमालेका नेता प्रदीप ज्ञवालीले प्रधानमन्त्री बालेन्द्र साह (बालेन) को “नेपाल हाँसेको हेर्न चाहन्छु” भन्ने नारामाथि कटाक्ष गरेका छन्।

शनिवार काठमाडौँमा आयोजित कार्यक्रममा उनले बागमती किनारबाट विस्थापित नागरिकको अवस्थालाई उल्लेख गर्दै यस्तो नारा व्यवहारसँग मेल नखाने बताए। “बागमती किनारमा बगिरहेका आँसुले नेपाल हाँसेको देखिन्छ कि रोइरहेको ? ” भन्दै उनले प्रश्न गरे।

ज्ञवालीले सुकुमबासी  बस्ती हटाउँदा सरकार असंवेदनशील देखिएको आरोप लगाउँदै आवास, खाद्य, रोजगारी र स्वच्छ वातावरणजस्ता मौलिक हक सुनिश्चित गर्नुपर्नेमा जोड दिए। उनले विकास मानवकेन्द्रित हुनुपर्ने बताए।

साथै, सरकारको कार्यशैलीप्रति असन्तुष्टि जनाउँदै उनले लोकतान्त्रिक अधिकार संकुचन, मिडिया नियन्त्रण र अध्यादेशमार्फत कानुन ल्याउने प्रवृत्तिप्रति चिन्ता व्यक्त गरे।