बालेनलाई घनश्याम भुसालको चेतावनी : ओलीको जस्तै नियति भोग्नु नपरोस्

काठमाडौं । नेकपा (संयुक्त) का कार्यवाहक अध्यक्ष घनश्याम भुसालले विगतका सरकारका असफलताबाट पाठ सिकेर अघि बढ्न प्रधानमन्त्री बालेन्द्र साहलाई सुझाव दिएका छन् ।

बुधबार काठमाडौंको बबरमहलस्थित सडकमा आयोजित पत्रकार सम्मेलनमा बोल्दै भुसालले प्रधानमन्त्री साह शक्तिशाली अवस्थामा रहेको उल्लेख गर्दै गल्ती गर्ने छुट नभएको बताएका हुन् । उनले विगतमा केपी ओलीलाई पनि सत्तामा रहँदा गल्ती नगर्न सुझाव दिएको स्मरण गर्दै त्यसलाई बेवास्ता गर्दा गम्भीर परिणाम भोग्नुपरेको दाबी गरे ।

भुसालले प्रधानमन्त्री साहले पनि त्यही बाटो दोहोर्याएमा उस्तै अवस्था आउन सक्ने चेतावनी दिए । ‘तपाईं जति शक्तिशाली हुनुहुन्छ, यदि गल्ती गर्नुभयो भने धेरै चाँडै तपाईंमाथि संकट आउन सक्छ,’ उनले भने ।

उनले वर्तमान सरकार असफल भए त्यसको असर केवल सत्तापक्षमा मात्र सीमित नहुने, समग्र देश र नागरिकले मूल्य चुकाउनुपर्ने बताए । ‘सरकार असफल हुँदा कसैले प्रतिपक्षको हिसाबले खुशी मनाउन सक्छन्, तर यसको मूल्य सबैले तिर्नुपर्छ,’ उनले उल्लेख गरे ।

भुसालले २०७६ सालतिर आफूले तत्कालीन प्रधानमन्त्री ओलीलाई व्यक्तिगत रूपमा सचेत गराएको प्रसंग पनि सुनाए । लोकप्रियताको उच्च विन्दुमा रहेका बेला नै ओलीको राजनीतिक दिशा गलततर्फ जान थालेको आफूले देखेको र सचेत गराउँदा त्यसलाई बेवास्ता गरिएको उनले बताए ।

उनले इतिहासबाट पाठ सिक्न आग्रह गर्दै सत्ता र शक्तिको दुरुपयोग नगर्न प्रधानमन्त्री साहलाई सचेत गराए । ‘इतिहासलाई गिज्याउने काम नगर्नुहोस्, त्यसबाट सिक्नुहोस्,’ उनले भने ।

भुसालले आफ्नै असफलताबाट समेत नयाँ नेतृत्वले सिकेर सफल भए आफू त्यसलाई गर्वका रूपमा लिने बताए । साथै, कुनै पनि शक्तिशाली शासकले विगतका कमजोरीबाट पाठ नलिए नागरिकले ठूलो मूल्य चुकाउनुपर्ने अवस्था आउनेतर्फ पनि उनले ध्यानाकर्षण गराए ।