सरकारको कार्यशैलीप्रति प्रचण्डको असन्तुष्टि

सुर्खेत । नेपाल कम्युनिस्ट पार्टी (नेकपा) का संयोजक प्रचण्डले सरकारको कार्यशैलीप्रति असन्तुष्टि जनाएका छन् । सरकार नसुध्रिए सदन र सडकबाट आन्दोलन गर्न बाध्य हुने उनको भनाइ छ ।

प्रेस सेन्टर नेपाल सुर्खेतले आइतबार आयोजना गरेको पत्रकार सम्मेलनमा प्रचण्डले जेनजी आन्दोलन र त्यसपछिको घटनाक्रमले देशको राजनीति असहज दिशातर्फ गएको बताए । निर्वाचन सम्पन्न भई नयाँ सरकार बने पनि राजनीति अझै सही ट्र्याकमा अघि बढ्न नसकेको उनको भनाइ छ ।

सुकुम्वासी, विद्यार्थी तथा ट्रेड युनियनसम्बन्धी समस्या समाधान नभएको उनको भनाइ छ । “यी विषय अहिले पनि गम्भीर समस्याका रूपमा रहेका छन्,” उनले भने ।”

संविधान संशोधनका लागि सरकारले तयार पारिरहेको बहसपत्र पारदर्शी नभएको प्रचण्डको भनाइ छ । अध्यादेशमार्फत सरकारले अस्वाभाविक ढंगले काम गरिरहेको उनको आरोप छ ।

“झण्डै दुईतिहाइको सरकारबाट जनताले राम्रो कामको अपेक्षा गरेका थिए । सुरुमा सरकारले १०० दिने कार्ययोजना सार्वजनिक गर्दा आशा जागेको थियो । तर, पछि सरकार संसद्लाई छल्दै अघि बढ्न खोजीरहेको देखियो,” उनले भने, “सरकारका सकारात्मक काममा सहयोग गर्ने र दिएका सुझावलाई बेवास्ता गरिए त्यही तरिकाले अगाडि बढ्ने हाम्रो योजना छ ।”

फरक प्रसंगमा उनले पार्टीको महाधिवेशनबाट नयाँ पार्टी निर्माण गर्ने निर्णय भएको जानकारी दिँदै वामपन्थी एकताको विषयलाई पनि अघि बढाइएको बताए । तर, तत्कालै एकता हुने अवस्था भने नरहेको उनको भनाइ छ ।