‘देउवा’ बिनाकाे कांग्रेसलाई चुनौती

काठमाडौं । आउदाे फागुन २१ गते हुने प्रतिनिधिसभा सदस्य निर्वाचनमा डडेल्धुरामा आफ्नो परम्परागत प्रभाव जोगाउन नेपाली कांग्रेस सक्रिय भएको छ ।

वि.सं २०४८ साल यता निरन्तर जित निकाल्दै आएको यस क्षेत्रमा यसपटक पूर्वसभापति शेरबहादुर देउवा उम्मेदवार नहुँदा कांग्रेसका लागि चुनौती थपिएको देखिन्छ ।

वि.सं २०७९ सालसम्म सात पटक यही क्षेत्रबाट निर्वाचित हुँदै प्रधानमन्त्री र पार्टी सभापतिसमेत बनेका देउवा चुनावी मैदानमा नउत्रिएपछि प्रतिस्पर्धी दलहरूले पनि आफ्नो पक्षमा मत परिणाम पार्न अभियान तीव्र पारेका छन् ।

कांग्रेसले भने युवा नेता नैनसिंह महरलाई उम्मेदवार बनाउँदै विजयी यात्रा निरन्तर राख्ने रणनीति अपनाएको छ ।

महर नेपाल विद्यार्थी सङ्घका पूर्वकेन्द्रीय सभापतिसमेत हुन् । उनले मतदाताको विश्वास जित्दै जनअपेक्षाअनुसार काम गर्ने प्रतिबद्धता जनाइरहेका छन् । जेनजी आन्दोलनका क्रममा देउवा दम्पत्तिमाथि भएको आक्रमण, त्यसपछिको राजनीतिक परिस्थिति र देउवा उम्मेदवार नहुनुले कांग्रेसलाई गृहजिल्लामै दबाब सिर्जना गरेको विश्लेषकहरूको भनाइ छ ।

कांग्रेस डडेल्धुराका सचिव हेमराज चटौतले देउवा स्वास्थ्यका कारण प्रचारमा सक्रिय हुन नसक्ने चर्चा निराधार भएको बताए । “उहाँ प्रचारप्रसारमा नआउने भन्ने हल्ला मात्रै हो, पार्टीका कार्यक्रममा उहाँ सहभागी हुनुहुन्छ,” उनले भने ।

यता नेकपा (एमाले) बाट चक्र स्नेही पहिलो पटक प्रतिनिधिसभा निर्वाचनमा उम्मेदवार बनेका छन् । विद्यार्थी जीवनदेखि एमाले राजनीतिमा सक्रिय स्नेही २०७४ मा राष्ट्रियसभा सदस्य भइसकेका छन् । एमाले जिल्ला अध्यक्ष गजेन्द्र शाहीले पार्टीपङ्क्ति पूर्ण रूपमा चुनावी अभियानमा खटिएको दाबी गरे ।

डडेल्धुरामा यसपटक नेपाली कांग्रेस, नेकपा (एमाले), नेपाली कम्युनिष्ट पार्टी र राष्ट्रिय स्वतन्त्र पार्टीबीच मुख्य प्रतिस्पर्धा हुने देखिएको छ । नेपाली कम्युनिष्ट पार्टीबाट मानसिंह माल उम्मेदवार छन् ।

घरदैलो अभियानका क्रममा उनले डडेल्धुरालाई शिक्षा र स्वास्थ्यको केन्द्र बनाउन सकिने सम्भावना रहेको बताएका छन् ।
राष्ट्रिय स्वतन्त्र पार्टीका उम्मेदवार डा. ताराप्रसाद जोशी पनि सक्रिय छन् । यसअघि एमाले, एकीकृत समाजवादी लगायत हुँदै रास्वपामा पुगेका जोशीले प्रदेशसभा सदस्य पदबाट राजीनामा दिएर प्रतिनिधिसभामा उम्मेदवारी दिएका हुन् । “नयाँ सोच र पुरानो अनुभवको समिश्रण आजको आवश्यकता हो,” उनले भने ।
विसं २०७९ को निर्वाचनमा देउवाले २५ हजार ५३४ मत ल्याउँदा उनका निकटतम प्रतिस्पर्धी स्वतन्त्र उम्मेदवार सागर ढकालले १३ हजार ४२ मत प्राप्त गरेका थिए ।

प्रतिनिधिसभातर्फ एकमात्रै निर्वाचन क्षेत्र रहेको डडेल्धुरामा कूल ९३ हजार ४०३ मतदाता रहेका छन् । अघिल्लो निर्वाचनको तुलनामा दुई हजार २०२ मतदाता थपिएका छन् । जिल्लामा १०४ मतदानस्थल र १४१ मतदान केन्द्र कायम गरिएका छन्, जसमध्ये ३३ मतदानस्थल ‘अतिसंवेदनशील’ सूचीमा राखिएका छन् ।

यसैगरी राप्रपा, आम जनता पार्टी, राष्ट्रिय जनमोर्चा, श्रम संस्कृति पार्टी, जय मातृभूमि पार्टी, नेपाल मजदुर किसान पार्टी र स्वतन्त्र उम्मेदवारहरू समेत चुनावी मैदानमा छन् । करिब ३४ वर्षपछि पहिलो पटक डडेल्धुराका मतदाताले कांग्रेसबाट देउवाबाहेकका उम्मेदवारलाई मत हाल्ने अवस्था बनेको छ ।