चितवनका मतदाताले रविलाई राेधेः जेनजी विद्राेहमा जेलबाट किन भागेकाे ?

चितवन । चितवन–२ मा घरदैलो कार्यक्रममा रहेका राष्ट्रिय स्वतन्त्र पार्टी (रास्वपा)का सभापति रवि लामिछानेलाई एक मतदाताले ‘जेनजी आन्दोलन’का विषयमा प्रश्न गरेका छन् ।

मतदाताले भदौ २३ र २४ मा भएको आन्दोलनका क्रममा लामिछानेसहित धेरै कैदीबन्दी बाहिर निस्किएको तथा आन्दोलनको नेतृत्वसमेत गरेको भन्ने चर्चा रहेको उल्लेख गर्दै स्पष्टिकरण मागे । ‘जेनजी आन्दोलनका क्रममा तपाईं बाहिर निक्लिनुभयो, धेरै कैदीबन्दी पनि निक्लिए ।

तपाईंले नै नेतृत्व गरेको भन्ने चर्चा छ । सत्य कुरा के हो ?’ ती मतदाताले प्रश्न गरे । जवाफमा लामिछानेले आफू कुनै पहुँच वा शक्ति प्रयोग गरेर बाहिर ननिस्किएको दाबी गरे। उनले जेल प्रशासनले बयानका लागि पत्र थमाएर पठाएको बताए ।

‘त्यसबेला आन्दोलनकै बीच बयान दिन जाने म एक्लो कैदीबन्दी थिएँ । पाँचवटा फलामे ढोकाभित्र बस्नुपर्छ कैदीले । मेरो के पहुँच थियो र ? उसले त जेल जोगाएको रहेछ भनेर आयोगका प्रमुख र जेलरले नै भन्नुभएको थियो,’ लामिछानेले भने, ‘अरु भागेर गए, म आन्दोलनको हुलमा गएँ । बाँकी कुरा उमेर र राजनीतिक चेतनाका रूपमा यति परिपक्व हजुरको विवेकलाई छाडेँ ।’