जनलहरमा रमाए प्रेमबहादुर आले (भिडिओ)

धनगढी । कैलाली निर्वाचन क्षेत्र नं. ५ मा उम्मेदवार प्रेमबहादुर आलेको पक्षमा दिनप्रतिदिन जनलहर बढ्दै गएको छ ।

नेपाली कम्युनिष्ट पार्टी (नेकपा) का तर्फबाट उम्मेदवारी दिएका आले हाल घरदैलो अभियानमार्फत मतदातासँग प्रत्यक्ष भेटघाटमा व्यस्त रहनु भएको छ ।

कैलाली क्षोत्र नं. ५ का विभिन्न गाउँ–टोलमा पुग्नु भएका उम्मेदवार आलेलाई त्यहाँ स्थानीय बासिन्दाले भव्य स्वागत गर्दै सांस्कृतिक कार्यक्रममार्फत समर्थन जनाइरहेका छन् ।

आज धनगढी उपमहानगरपालिका–१७ का विभिन्न वडामा आयोजित भेटघाट कार्यक्रममा स्थानीय युवायुवती र आमा समूहले चुनावी गीतमा छमछमी नाच्दै उम्मेदवार आलेलाई नचाउदै उत्साह थपेका थिए ।

उम्मेदवार आलेले आफ्ना विकासका एजेन्डा सार्वजनिक गर्दै पूर्वाधार विकास, शिक्षा, स्वास्थ्य, रोजगारी सृजना र कृषि आधुनिकीकरणलाई प्राथमिकतामा राखेको बताउनु भएको छ ।

उहाँले भन्नुभयो, “जनताको विश्वास नै मेरो शक्ति हो, विकासको स्पष्ट योजना लिएर म तपाईंहरू माझ आएको छु ।”
स्थानीय मतदाताहरुले पनि उम्मेदवार आलेप्रति सकारात्मक प्रतिक्रिया दिएका छन् ।

स्थानीय धनीराम रानाले भने, “हामीले विकास चाहेका छौँ, आश्वासन होइन । आलेज्यूले काम गर्ने प्रतिबद्धता देखाउनुभएको छ, काम गर्नेलाई हाम्रो सहयोग हुन्छ ।”

आले प्रतिको दिनप्रतिदिन बढ्दो जनसमर्थन र सांस्कृतिक उत्साहले कैलाली–५ मा चुनावी माहोल तातेको देखिन्छ । अबको निर्वाचनमा यस क्षेत्रको परिणाम कस्तो आउला भन्ने चासो सबैमा बढेको छ ।