रफ्फुले च्यातिएको ढाक्ला, तर इज्जत ढाक्दैन !

कपडा च्यातिए सिलाएर पुनः प्रयोग गर्न सकिन्छ; त्यो जीवनको सामान्य यथार्थ हो। तर जब विचार, नियत र नैतिकताको वस्त्र नै च्यातिएर छताछुल्ल हुन्छ, त्यसलाई रफ्फु गर्ने प्रयासले समस्या समाधान गर्दैन, बरु विकृतिलाई दीर्घायु बनाउँछ।

गल्ती स्वीकार गर्नु आत्मबलको परिचायक हो, तर गलत नियत वा कमजोरीलाई ढाकछोप गर्न खोज्नु नैतिक दिवालियापनको संकेत हो। अझ त्यसको बचाउमा उत्रिने व्यक्तिले केवल दोषलाई वैधता दिने काम मात्र गर्दैन, आफ्नो विश्वसनीयता र सामाजिक सम्मानसमेत दाउमा लगाउँछ।

समाजले भौतिक अभाव, कमजोरी वा असफलतालाई क्षमा गर्न सक्छ; तर चरित्र, नियत र नैतिकतामा परेको प्वाललाई सहजै क्षमा गर्दैन। किनकि कपडाको च्यातिएको भाग सिउन सकिन्छ, तर विश्वास च्यातिएपछि त्यसलाई पुरानै अवस्थामा फर्काउन अत्यन्त कठिन हुन्छ।

रफ्फु कपडामा प्रयोग गर्ने विधि हो । इज्जत ढाक्न प्रयोग गर्ने अस्त्र होइन ।