घट्यो काठमाडौंको वायु प्रदूषण

काठमाडौं : बिहीबार राति परेको वर्षासँगै काठमाडौं उपत्यकाको वायु प्रदूषण घटेको छ। वर्षापछि शुक्रबार बिहान उपत्यकाको वायु गुणस्तर सूचकांक एक्युआई ३४ मा झरेको छ, जुन स्वास्थ्यका दृष्टिले राम्रो र सुरक्षित स्तर मानिन्छ।

बिहीबारसम्म उपत्यकाको वायु गुणस्तर सूचकांक १५० भन्दा माथि पुगेको थियो, जसले वायु प्रदूषण अस्वस्थ स्तरमा पुगेको संकेत गरेको थियो। वर्षासँगै हावामा रहेका धुलो तथा धुवाँका कणहरू कम भएपछि वायुको गुणस्तरमा सुधार आएको हो।

वायु गुणस्तर सूचकांकअनुसार ५० सम्म ‘राम्रो’, ५१–१०० ‘मध्यम’, १०१–१५० ‘संवेदनशील समूहका लागि अस्वस्थ’, १५१–२०० ‘अस्वस्थ’, २०१–३०० ‘निकै अस्वस्थ’ र ३०१ भन्दा माथि पुगेमा ‘खतरनाक’ स्तर मानिन्छ।

यसअघि काठमाडौंको वायु गुणस्तर सूचकांक २०० सम्म पुगेको थियो, जसले स्वास्थ्यका दृष्टिले हानिकारक अवस्था सिर्जना गरेको थियो। पछिल्लो वर्षापछि भने उपत्यकाको हावामा सुधार देखिएको छ।