बालेन नेतृत्वको सरकार गठन अन्तिम चरणमा

काठमाडौं । राष्ट्रिय स्वतन्त्र पार्टी (रास्वपा) बालेन शाह नेतृत्वमा गठन हुन लागेको नयाँ सरकारका लागि मन्त्रिपरिषद् चयनको अन्तिम तयारीमा जुटेको छ।

पार्टी स्रोतका अनुसार केही मन्त्रालय र मन्त्रीहरूको टुंगो लागिसकेको छ भने बाँकी नामहरूबारे पार्टी सभापति रवि लामिछाने ले अन्तिम छलफल गरिरहेका छन्।

बालेनले यही चैत १३ गते प्रधानमन्त्री पदको शपथ ग्रहण गर्ने तयारी गरेका छन्। सोही दिन सानो आकारको मन्त्रिपरिषद् गठन गर्ने योजना छ।

हाल १५ देखि १८ सदस्यीय मन्त्रिपरिषद् बनाउने विषयमा छलफल भइरहेको छ। रास्वपाले चुनावी वाचापत्रमै मन्त्रालयको संख्या १८ मा सीमित गर्ने प्रतिबद्धता जनाएकोले सोहीअनुसार संरचना तयार पार्न खोजिएको हो।

केही मन्त्रालय गाभेर सरकारलाई चुस्त बनाउने तयारी भइरहेको छ। एक नेताका अनुसार यसपटक मन्त्रिपरिषद्मा “अप्रत्याशित” नामहरू पनि समावेश हुन सक्नेछन्। साथै, पार्टी सञ्चालनका लागि केही शीर्ष नेतालाई मन्त्री नबनाई “रिजर्भ” मा राख्ने योजना पनि बनाइएको छ।