मुगुमा आयुर्वेद उपचारप्रति बढ्दो विश्वास

मुगु । जिल्लामा आयुर्वेद उपचारप्रति नागरिकको आकर्षण तीव्र रूपमा बढ्दै गएको छ । सदरमुकाम गमगढीस्थित आयुर्वेद औषधालयमा पछिल्लो तीन वर्षयता उपचारका लागि आउने बिरामीको संख्या उल्लेख्य रूपमा वृद्धि भएको पाइएको छ ।

जिल्ला अस्पताल ठिनी नजिकै आयुर्वेद स्वास्थ्य केन्द्र स्थापना भएपछि स्थानीयले सेवा–सुविधाबारे जानकारी पाउन थालेका छन् । त्यसयता आयुर्वेद उपचार गराउने र औषधि लिने बिरामीको संख्या दिनप्रतिदिन बढ्दै गएको केन्द्रले जनाएको छ ।

केन्द्रका सूचना अधिकारी लक्ष्मीप्रसाद पाण्डेका अनुसार विशेषगरी दीर्घरोगी र ज्येष्ठ नागरिकले बढी सेवा लिने गरेका छन् । ग्यास्ट्रिक, पेट दुख्ने, खाना नपच्ने, दम, बाथरोग तथा जोर्नीसम्बन्धी समस्याका बिरामीको संख्या उच्च रहेको छ । पहिले आयुर्वेदप्रति कम विश्वास गर्नेहरू समेत अहिले उपचारका लागि आउने क्रम बढेको उनले बताए ।
उनका अनुसार केन्द्रमा आउने अधिकांश बिरामी पेटसम्बन्धी समस्याबाट पीडित हुने गरेका छन् । गत आर्थिक वर्ष २०८१/८२ मा १५ हजार ९ सय ४६ जनाले सेवा लिएका थिए भने चालु आर्थिक वर्ष २०८२/८३ को फागुनसम्म ९ हजार ४ सय ५१ जनाले सेवा लिइसकेका छन् ।

केन्द्रमा पायल्स रोगका बिरामीका लागि क्षारसूत्र विधिबाट शल्यक्रिया सेवा उपलब्ध छ । स्वास्थ्य विभागबाट सिफारिस गरिएका ३५ प्रकारका औषधिमध्ये २३ प्रकारका औषधि निःशुल्क वितरण हुँदै आएको छ ।

साथै अक्युपञ्चर, श्वासप्रश्वास, रक्तचाप, महिलाको महिनावारी समस्या तथा सेतोपानी सम्बन्धी उपचारका लागि दैनिक २० देखि ३० जना बिरामी आउने गरेका छन् ।

कार्यालय प्रमुख डा. रुपेश सोनामका अनुसार केन्द्रले प्रयोगशाला सम्बन्धी सबै सेवा निःशुल्क उपलब्ध गराउँदै आएको छ । प्रत्येक आइतबार बिहान ८ बजेदेखि नियमित सेवा सञ्चालन हुने व्यवस्था गरिएको छ ।

स्थानीय स्तरमा पाइने जडीबुटीको प्रयोग, आयुर्वेद तथा योग शिक्षा, स्वस्थ जीवनशैलीसम्बन्धी जनचेतनामूलक कार्यक्रम सञ्चालन गरिएपछि नागरिकको आकर्षण थप बढेको उनले बताए ।

मुगमकार्मारोङ, सोरु, खत्याड गाउँपालिका तथा छायाँनाथ रारा नगरपालिकाका विभिन्न स्थानमा नागरिक आरोग्य केन्द्र स्थापना गरी सेवा विस्तार गरिएको छ ।

स्थानीय दत्त मल्लले लामो समयदेखि शरीर दुख्ने र चिलाउने समस्या आयुर्वेद उपचारबाट निको भएको अनुभव सुनाए ।
आयुर्वेदप्रतिको विश्वास बढ्दै जाँदा मुगुमा वैकल्पिक उपचार प्रणाली प्रभावकारी बन्दै गएको देखिएको छ ।