बाजुरामा ३५ परिवार विस्थापित, भेडीगोठमा आगजनी

बाजुरा । बाजुराको हिमाली गाउँपालिका–३ रानीसैन क्षेत्रमा पुनः तनाव बढ्दै जाँदा ३५ भन्दा बढी भोटे समुदायका परिवार विस्थापित भएका छन्। स्थानीय अनुसार भेडीगोठमा आगजनी र कुटपिट भएपछि उनीहरू क्षेत्र छोड्न बाध्य भएका हुन्।

स्थानीय भोटे समुदायका प्रतिनिधिहरूका अनुसार हुम्ला क्षेत्रबाट आएका समूहले अस्थायी रूपमा भेडा चराउँदै बसोबास गरिरहेका परिवारलाई रानीसैन क्षेत्रबाट लखेटेका हुन्। घटनाक्रमपछि उनीहरूको भेडीगोठमा समेत आगजनी गरिएको आरोप छ।

भोटे जनजाति महासंघका केन्द्रीय अध्यक्ष जनक भण्डारीका अनुसार गोठमा रहेका भेडा, खाद्यान्न तथा भाँडाकुँडा समेत जलाइएको छ। साथै, केही व्यक्तिबाट मोबाइल फोन खोसिएको दाबी पनि गरिएको छ।

सामाजिक सञ्जालमा सार्वजनिक भिडियोहरूमा भेडीगोठ जलिरहेको र विवादास्पद अभिव्यक्ति दिइएको देखिन्छ। प्रहरीको उपस्थितिमै घटनाक्रम भएको दाबी पनि स्थानीय पक्षले गरेका छन्।

विवादित रानीसैन क्षेत्र बाजुराको प्रशासनिक नक्सामा पर्ने भए पनि हुम्ला क्षेत्रका केही व्यक्तिले यसलाई आफ्नो क्षेत्र भएको दाबी गर्दै आएको स्थानीय बताउँछन्। यसले लामो समयदेखि सीमासम्बन्धी विवाद चर्किँदै गएको देखिन्छ।

यसअघि जेठ ५ गते सोही क्षेत्रमा पर्यटन प्रवर्द्धनका लागि पुगेको टोलीमाथि कुटपिट भएको घटना सार्वजनिक भएको थियो। त्यस घटनामा स्थानीय जनप्रतिनिधि र सुरक्षाकर्मीसमेत घाइते भएका थिए। त्यसयता लगातार तनाव बढ्दै गएको हो।

जिल्ला प्रशासन कार्यालय बाजुराका अनुसार घटनाको वास्तविक अवस्था बुझ्न प्रहरी टोली परिचालन गरिएको छ। बुधबारदेखि प्रभावित क्षेत्रमा अस्थायी प्रहरी चौकी राख्ने तयारीसमेत भइरहेको प्रशासनले जनाएको छ।

प्रहरीका अनुसार घटनास्थलमा सुरक्षा निकाय परिचालन भइसकेको छ भने हुम्ला र बाजुरा दुवैतर्फका सुरक्षाकर्मीले स्थिति नियन्त्रणमा लिने प्रयास गरिरहेका छन्।

स्थानीयवासीले घटनाको निष्पक्ष छानबिन गरी दोषीलाई कारबाही गर्न माग गरेका छन्। साथै, सीमा विवादलाई वार्ता र समन्वयमार्फत समाधान गर्नुपर्ने उनीहरूको आग्रह छ।