प्रेम आलेलाइ धनगढीका बासिन्दा भन्छन् : ‘हाम्रो नेता तपाईंनै हाे’

धनगढी : कैलाली निर्वाचन क्षेत्र नम्बर ५ का उम्मेदवार प्रेमबहादुर आले मतदातालाई धन्यवाद दिन धनगढी उपमहानगरपालिका वडा नम्बर ५ र ६ मा पुगेका छन्।

मतदातालाई भेटेर आभार व्यक्त गर्ने क्रममा स्थानीय बासिन्दाले आलेलाई चुनावको परिणामले साथ नछुट्ने बताएका छन्।

उनीहरूले “यो पटक चुनाव हारे पनि हाम्रो साथ नछोड्नु होला, हामी तपाईंको साथमै छौं, हाम्रो नेता तपाईं नै हो” भन्दै निरन्तर साथ र समर्थन रहने प्रतिबद्धता व्यक्त गरेका थिए।

स्थानीयले आगामी दिनमा पनि क्षेत्रको विकास र जनताका समस्याका लागि अघि बढ्न आग्रह गरेका छन्।

मतदातासँग भेटघाट गर्दै आलेले आफू सधैं जनताको सेवामा रहने र चुनावको नतिजाले आफ्नो प्रतिबद्धता कमजोर नबनाउने बताएका छन्।

उनले जनताले दिएको माया, विश्वास र साथप्रति धन्यवाद व्यक्त गर्दै आगामी दिनमा पनि जनताकै बीचमा रहेर काम गर्ने प्रतिबद्धता दोहोर्‍याएका छन्।