काठमाडौं । लामो समयपछि मनसुन सक्रिय भएसँगै मधेश प्रदेशमा पनि वर्षा शुरू भएको छ । सोमबार रातिदेखि मधेशमा पानी पर्न थालेको मौसम विज्ञान विभागले जनाएको छ ।
यसअघि मधेश र कोशीमा मनसुनी प्रणाली फैलिन नसक्दा पर्याप्त वर्षा हुन सकेको थिएन । वर्षा नहुँदा कोशी र मधेशका सबै किसानले धान रोपाइँ गर्न पाएका छैनन् । अब भने मधेशमा लगातार वर्षा गराउने प्रणाली विकसित हुँदै गएको मौसम पूर्वानुमान महाशाखाले जनाएको छ ।
हाल बागमती प्रदेशका केही स्थानका साथै कोशी, गण्डकी, कर्णाली र सुदूरपश्चिमका केही ठाउँमा हल्कादेखि मध्यम वर्षा भइरहेको छ।
महाशाखाका अनुसार आज देशका विभिन्न स्थानमा वर्षाको सम्भावना छ । दिउँसो कोशीका थोरै स्थानमा धेरै ठूलो पानी पर्ने सम्भावना छ । यसैगरी, मधेश, वाग्मती, गण्डकी र लुम्बिनीका एकरदुई स्थानमा समेत ठूलो पानी पर्ने सम्भावना छ ।
कोशीका तराई तथा मधेशका केही स्थानमा हावाहुरीको पनि सम्भावना छ ।
आज राति कोशी, मधेश र सुदूरपश्चिमका एकरदुई स्थानमा भारी वर्षाको सम्भावना छ । देशको उच्च पहाडी तथा हिमाली भूभागका थोरै स्थानमा हल्कादेखि मध्यम वर्षा र हिमपातको सम्भावना छ ।
हाल देशभर मनसुनी वायुको प्रभाव छ। मनसुनको न्यून चापीय रेखा पश्चिममा सरदर स्थानको आसपास र पूर्वमा सरदर स्थानको केही उत्तरतर्फ रहेको महाशाखाले जनाएको छ ।
