घरदैलो अभियानले उत्साहित मगर, भन्छन् – जनता मेरो साथमा छन्

कैलाली । कैलाली क्षेत्र नं. ५ का प्रतिनिधि सभा सदस्यका उम्मेदवार प्रेमबहादुर आले मगरले जनताको समर्थन आफ्नो पक्षमा रहेको दाबी गरेका छन् । चुनावी प्रचारप्रसारका लागि घरदैलो तथा भेटघाट अभियानका क्रममा पाएको प्रतिक्रिया र जनताको सहभागिताले आफूलाई थप आत्मविश्वासी बनाएको उनले बताए ।

“मैले जनतासँग सधैँ सिधा र इमानदार कुरा गरेको छु,” उनले भने, “त्यसैको परिणामस्वरूप आज जनता मेरो पक्षमा छन् भन्ने महसुस भइरहेको छ।”

आले मगरले ढाँटेर वा असम्भव आश्वासन बाँडेर होइन, व्यवहारिक र जनजीवनसँग जोडिएका मुद्दालाई अघि सारेर चुनावी अभियान चलाइरहेको बताए । शिक्षा, स्वास्थ्य, रोजगारी र आधारभूत पूर्वाधार आफ्नो प्रमुख एजेन्डा रहेको उनको भनाइ छ ।

घरदैलो अभियानमा सहभागी स्थानीय बासिन्दाले पनि प्रेम आले मगरलाई जनताको कुरा सुन्ने, स्पष्ट बोल्ने र भरोसायोग्य नेताका रूपमा लिएको प्रतिक्रिया दिएका छन् ।