वृद्धलाई गाडीबाट ओर्लिएर थप्पड हान्ने पुरूष पक्राउ

काठमाडौं । सडकमा हिँडिरहेका वृद्धलाई गाडीबाट ओर्लिएर मुक्का बर्साउने पुरूष पक्राउ परेका छन् ।

काठमाडौंको चप्पल कारखानानजिकै चक्रपथमा आफूलााई मुख छाडेको भन्दै वृद्धमाथि मुक्का बर्साउने पारस बम नामका व्यक्तिलाई ट्राफिक प्रहरीले नियन्त्रणमा लिएको हो ।

मंगलबार बिहानैदेखि वृद्धमाथि मुक्का बर्साएको भिडियो सामाजिक सञ्जालमा भाइरल भएपछि प्रहरीमाथि दबाब बढेको थियो ।

सडकमा हिँडिरहेका एक वृद्धलाई ती जीप चालकले पटक पटक मुक्का हानेको भिडियोले सामाजिक सञ्जाल तातेपछि प्रहरीलाई तनाव भएको थियो ।

उक्त भिडियोमा एकजना अधवैंशे बा।३ च ११०३ नम्बरको जीपबाट झरेर हिँडिरहेका ती वृद्धमाथि गाली गर्दै हातपात गरेका देख्न सकिन्छ।

‘ए जँडिया के भन्या ओई तैँले,’ भन्दै ती चालकले वृद्धको टाउकोमा मुक्का हानेका थिए । चालकसँगैकी महिला पनि वृद्धलाई गाली गर्दै खनिएकी थिइन् ।