बालेनका चुनौती !

भर्खरै सम्पन्न निर्वाचन परिणामले राष्ट्रिय स्वतन्त्र पार्टी (रास्वपा) सबैभन्दा ठुलाे दल बन्नुका साथै शक्तिशाली सरकार बनाउने सुबिधा प्राप्त छ । रास्वपाका सभापति रवि लामिछाने र बालेनबिच भएकाे लिखित सहमति अनुसार रास्वपाका बरिष्ठ नेता बालेन्द्र साह (बालेन) शक्तिशाली सरकारकाे प्रधानमन्त्री बन्ने पक्कापक्की भएपछि यति बेला अब सबैको ध्यान सरकारको नेतृत्वतर्फ केन्द्रित भएको छ। यदि बालेन्द्र साह (बालेन) प्रधानमन्त्रीका रूपमा अघि बढ्ने अवस्था बन्यो भने उनले सामना गर्नुपर्ने चुनौती केवल प्रतिपक्ष वा राज्य संयन्त्रसँग मात्र सीमित रहने छैन। पार्टीभित्रकै व्यवस्थापन पनि उनको नेतृत्वका लागि ठूलो परीक्षा बन्न सक्छ।

रास्वपा तुलनात्मक रूपमा नयाँ राजनीतिक शक्ति भएकाले यसको संगठनात्मक संरचना अझै पूर्ण रूपमा स्थिर भइसकेको छैन। पार्टीभित्र विभिन्न पृष्ठभूमिबाट आएका नेता तथा कार्यकर्ताहरू छन्। मिडिया, व्यवसाय, सामाजिक क्षेत्र र परम्परागत राजनीतिबाट आएका व्यक्तिहरू एउटै मंचमा हुँदा विचार, अनुभव र कार्यशैलीमा भिन्नता देखिनु स्वाभाविक हो। यस्तो अवस्थामा साझा दृष्टिकोण कायम राख्नु नेतृत्वका लागि चुनौतीपूर्ण हुन्छ।

अर्कोतर्फ, सत्ता प्राप्तिसँगै अवसर र आकांक्षा पनि बढ्छन्। मन्त्री पद, संसदीय जिम्मेवारी र विभिन्न राजनीतिक नियुक्तिका विषयमा पार्टीभित्र आकांक्षीहरूको संख्या स्वाभाविक रूपमा धेरै हुन्छ। सबैलाई सन्तुष्ट पार्न नसक्दा असन्तुष्टि देखिन सक्छ, जसले नेतृत्वमाथि दबाब सिर्जना गर्न सक्छ।

निर्णय प्रक्रियामा एकरूपता कायम राख्नु पनि अर्को चुनौती हो। नयाँ पार्टी भएकाले नीतिगत विषयमा सबैको धारणा सधैं समान नहुन सक्छ। सरकार सञ्चालन, आर्थिक नीति,परराष्ट नीति, कूटनीति वा प्रशासनिक सुधार जस्ता विषयमा फरक मत आउन सक्छन्। यस्तो अवस्थामा संवाद र सहमतिको संस्कृति बलियो बनाउन सके मात्र पार्टी एकताबद्ध रहन सक्छ।

यसबाहेक, बालेनको व्यक्तिगत लोकप्रियता पनि पार्टीभित्र सन्तुलन मिलाउनुपर्ने अर्को पक्ष बन्न सक्छ। जनस्तरमा लोकप्रिय नेतृत्व र संगठनात्मक संरचनाबीच सन्तुलन कायम राख्न सके मात्र पार्टीभित्र स्वस्थ वातावरण कायम रहन्छ।

अन्ततः बालेनका लागि सरकार सञ्चालन जत्तिकै महत्वपूर्ण काम पार्टीभित्र एकता र विश्वास कायम राख्नु पनि हुनेछ। यदि उनले आन्तरिक व्यवस्थापनलाई सन्तुलित र सहभागितामूलक बनाउन सके भने रास्वपाको उदय दीर्घकालीन राजनीतिक शक्ति बन्न सक्छ। तर आन्तरिक मतभेदलाई समयमै व्यवस्थापन गर्न नसकिए त्यो स्वयं नेतृत्वकै लागि चुनौती बन्न सक्छ।