समुन्द्रमुनि अप्टिकल फाइबर बिछ्याउँदै मेटा

काठमाडौं । फेसबुक, इन्स्टाग्राम, ह्वाट्सएप जस्ता विश्वचर्चित एपहरूको अभिभावक कम्पनी मेटाले समुन्द्रमुनि केबल नेटवर्क निर्माण गर्ने योजना बनाएको छ । टेकक्रन्चको एक रिपोर्ट अनुसार मेटाले ४० हजार किलोमिटर लामो फाइबर अप्टिक सबमरिन केबल निर्माण गर्ने योजना ल्याएको हो ।

सुरुवाती चरणमा कम्पनीले करिब दुई अर्ब अमेरिकी डलर लगानी गर्ने बताइएको छ । परियोजना अघि बढेसँगै यसको लागत १० अर्ब डलर (साढे १३ खर्ब रुपैयाँ बढी) सम्म पुग्ने अनुमान छ । मेटाले सन् २०२५ को सुरुवातमा यो परियोजनाको रुट, क्षमता र उद्देश्यबारे जानकारी दिने अपेक्षा गरिएको छ ।  विशेषज्ञहरूका अनुसार मेटाको पूर्ण स्वामित्वको यस केबल नेटवर्क सञ्चालनमा आउन केही वर्ष लाग्न सक्छ । योजना सफल भए मेटाले आफ्नै डेडिकेटेड रुट प्रयोग गरी विश्वभर उच्च स्तरको इन्टरनेट सेवा प्रदान गर्नेछ ।

रिपोर्टअनुसार मेटाको यो केबल पूर्वी अमेरिकाबाट सुरु भई भारत, दक्षिण अफ्रिका हुँदै अष्ट्रेलियाबाट फर्केर पश्चिमी अमेरिकासम्म फैलनेछ । यस परियोजनाले मेटालाई डेटा पूर्वाधारमा बलियो बनाइ विभिन्न भू–राजनीतिक संकटबाट पनि बचाउने विश्लेषण गरिएको छ । यसका लागि मेटाले रणनीतिक रूपमा सुरक्षित मार्गहरू पहिचान गरी केबल निर्माणको काम अगाडि बढाउन ध्यान दिनेछ ।

योसँगै मेटाले आफूलाई सोसल मिडिया प्लेटफर्मको रूपमा मात्र नभइ विश्वकै मुख्य पूर्वाधार कम्पनीको रूपमा चिनाउन चाहेको संकेत दिएको छ । हाल मेटा अन्तर्गतका प्लेटफर्महरूमा आबद्ध अरबौं प्रयोगकर्ताले १० प्रतिशत फिक्स्ड र २२ प्रतिशत मोबाइल ट्राफिक ओगट्छन् । यसलाई अझ प्रभावकारी बनाउन आफ्नै इन्टरनेट संरचना निर्माण गर्न तम्सिएको मेटा महत्त्वाकांक्षी योजनामा कत्तिको सफल होला, त्यो भविष्यले नै बताउला ।