बुद्ध जयन्तीको दिन गुम्बा भत्काइयो

काठमाडौं । सुकुमवासी बस्ती हटाउने क्रममा सरकारले बल्खुस्थित साङ्गे छोइलिङ्ग गुम्बा पनि भत्काएको छ। शुक्रबार बिहान बस्तीमाझ रहेको उक्त गुम्बामा डोजर चलाइएको हो।

गुम्बाका अध्यक्ष कपुरे तामाङका अनुसार, “कम्तीमा बुद्ध जयन्तीको दिन नभत्काइदिन आग्रह गरेका थियौं, तर हाम्रो कुरा नसुनी डोजर चलाइयो। अहिले बुद्धको मूर्ति लथालिङ्ग अवस्थामा छ।” उनका अनुसार गुम्बा २०७८ कात्तिक १३ गते दर्ता भएको थियो।

उक्त क्षेत्रमा बस्ती हटाउने क्रममा साझा पेट्रोल पम्प भने जोगाइएको छ भने अन्य टहरा भत्काइएको स्थानीयले बताएका छन्।

काठमाडौं महानगर क्षेत्रभित्रका खोला किनारमा रहेका ‘अव्यवस्थित बस्ती’ हटाउने अभियान अन्तर्गत शुक्रबार बिहानै बल्खु र टेकु नजिक पर्ने वंशीघाट क्षेत्रमा डोजर परिचालन गरिएको हो।

यसअघि काठमाडौं जिल्ला प्रशासन कार्यालयले सूचना जारी गर्दै निर्धारित समयभित्र बस्ती खाली गर्न निर्देशन दिएको थियो। सो सूचनापछि केही स्थानीयले आफैं घरटहरा खाली गर्न थालेका थिए।

घटनास्थलमा नेपाल प्रहरी, सशस्त्र प्रहरी र नगर प्रहरीको बाक्लो उपस्थिति रहेको थियो।