जन्ती बोकेको बस र मिनी ट्रक ठोक्किँदा एक जनाको मृत्यु, २६ घाइते

मोरङ । उदयपुरको उदयपुरगढीमा बिहीबार राति जन्ती बोकेको बस र मिनी ट्रक ठोक्किँदा एक यात्रुको मृत्यु भएको छ।

बाराबाट जन्ती लिएर गाईघाट जाँदै गरेको प्रदेश ०६–००१ ख ०१९५ नम्बरको बस र ना ८ ख २४०४ नम्बरको मिनी ट्रक राति करिब ९ बजे ठोक्किएर दुर्घटना हुँदा २६ जना घाइते भएका छन्। जिल्ला ट्राफिक प्रहरी कार्यालय उदयपुरका प्रहरी प्रमुख प्रहरी निरीक्षक चन्द्रबहादुर खड्काका अनुसार राति गाईघाटतर्फ जाँदै गरेको बस र गाईघाटबाट तेजपत्ता बोकेर निस्कदै गरेको मिनी ट्रक एकआपसमा ठोक्किएका थिए।

दुर्घटनामा गम्भीर घाइते भएका बारागढी गाउँपालिका–४ का ७० वर्षीय सीताराम धामीको विराटनगरस्थित न्यूरो अस्पतालमा उपचारका लागि भर्ना गरिएकोमा राति करिब पौने १२ बजे मृत्यु भएको हो। इन्स्पेक्टर खड्काका अनुसार दुर्घटनामा परेर बाराको बारागढी गाउँपालिका–४ का १५ वर्षीय दीपक चौधरी, ४२ वर्षीय श्रीकान्त बछार र ५५ वर्षीय बलिराम चौधरी गम्भीर घाइते अवस्थामा रहेका छन्।

प्रहरीका अनुसार घाइते हुनेहरु सबै जन्तीप आएकाहरू हुन्। यान्त्रिक गडबडीले दुर्घटना भएको प्रारम्भिक अनुसन्धानबाट खुलेको प्रहरीको भनाइ छ।