चौतर्फी दबाबपछि मन्त्री गुप्ताले दिए राजीनामा

काठमाडौँ । सङ्घीय मामिला तथा सामान्य प्रशासनमन्त्री राजकुमार गुप्ताले पदबाट राजीनामा दिएका छन् । उनले मंगलार प्रधानमन्त्री केपी शर्मा ओलीसमक्ष राजीनामा दिएका हुन् ।

मन्त्री गुप्ताले आफूमाथि लागेको आरोपको अनुसन्धान गरी सत्यतथ्य बाहिर ल्याउन सहयोग पुगोस् भनेर राजीनामा दिएको बताए ।

उनले आजसम्म आफूलाई सहयोग गरेका सबैप्रति धन्यवाद व्यक्त गर्दै आगामी दिनमा पार्टीले दिएको जिम्मेवारी निष्ठापूर्वक पूरा गर्ने प्रतिबद्धता व्यक्त गरे ।

उनका बारेमा विभिन्न सञ्चारमाध्यम तथा सामाजिक सञ्जालमा लाखौँ रुपैयाँ घुस लिएको श्रव्य सामग्री सार्वजनिक भएको छ ।

उनको अडिओ आएको धेरै समय भए पनि राजीनामा दिएका थिएनन् । उनको भ्रष्टाचारको काण्डको उनकै पार्टी एमालेका नेताहरुलेसमेत विरोध गरेपछि राजीनामा गर्न बाध्य भएका हुन् ।

उनीमाथि कारबाही नहुँदा ओली नेतृत्वको सरकारमाथि नै प्रश्न खडा भएपछि चौतर्फि दबाबबीच उनले राजीनामा दिएका हुन् ।