आईसीसी टी–२० विश्वकपः नेपालले इटालीको सामना गर्दै

काठमाडौं। आईसीसी टी–२० विश्वकप २०२६ अन्तर्गत समूह ‘सी’को दोस्रो खेलमा नेपालले आज इटालीको सामना गर्दै छ । मुम्बईको वानखेडे रंगशालामा दिउँसो सवा ३ बजे नेपाल र इटालीबीच खेल हुनेछ। दुवै देशले प्रतियोगिताको दोस्रो खेल खेल्न लागेका हुन् ।

पहिलो खेलमा नेपाल इंग्ल्यान्डसँग ४ रनले पराजित भएको थियो भने इटाली स्कटल्यान्डसँग ७३ रनले पराजित भएको थियो ।

समूह ‘सी’ को समीकरणका लागि यो खेल निर्णायक हुनेछ। दुवै टोली आफ्नो पहिलो खेलमा पराजित भएकाले सुपर ८ मा पुग्न यो खेल जित्नैपर्ने दबाबमा छन् । पराजित हुँदा विश्वकपको यात्रा समाप्त हुन सक्ने भएकाले नेपाली टोलीका लागि यो खेल महत्त्वपूर्ण मानिएको छ ।

दुई टोलीबीच १३ वर्षपछि प्रतिस्पर्धा हुन लागेको हो। यसअघि सन् २०१३ मा आईसीसी डिभिजन–३ अन्तर्गत ५० ओभरको फम्र्याटमा भेट भएको थियो। नेपाल र इटली पहिलो पटक टी–२० अन्तर्राष्ट्रिय फम्र्याटमा एक–अर्काविरुद्ध मैदान उत्रिँदै छन्।

नेपाल रहेको समूह ‘सी’ मा वेस्ट इन्डिजले हालसम्म खेलेका दुवै खेल जितेर ४ अंक जोडिसकेको छ। इंग्ल्यान्ड र स्कटल्यान्डले २ खेलमा २ अंक जोडेका छन्।

सन् २०१४ मा अफगानिस्तानलाई हराए यता नेपालले विश्वकपमा जित निकाल्न सकेको छैन। आजको खेल जितेर नेपाल १२ वर्ष लामो जितको खडेरी समाप्त गर्न चाहन्छ।