सरकारले संसद्मा बलमिचाइँ गर्न खोज्यो : सांसद शर्मा

काठमाडौँ । माओवादी सांसद रेखा शर्माले सरकारले संसद्मा बलमिचाइँ गर्न खोजेको आरोप लगाएकी छन् । प्रतिनिधिसभाको मंगलबारको बैठकको विशेष समयमा बोल्दै सांसद शर्माले यस्तो आरोप लगाएकी हुन् । उनले संसदीय समितिबाट पारित भएको विधेयक समेत मन्त्रीले संशोधन गरेको आरोप लगाइन् ।

उनले सरकारले संसद्मा विचाराधीन विधेयक समेत फिर्ता नलिई अध्यादेश जारी गरेको र मन्त्रीका होटलहरूमा समितिको बैठक राख्ने गरेको आरोप लगाइन् ।

उनले भनिन्, हामी देखिरहेका छौँ संसद्माथि सरकारको निरन्तर बलमिचाइँ भइरहेको छ । संसदीय समितिबाट पारित विधेयकलाई मन्त्रीबाट संशोधन हुन्छ । संसद्मा विचाराधीन विधेयकलाई फिर्ता समेत नलिई अध्यादेश जारी हुन्छ, मन्त्रीका होटेलहरूमा समितिका बैठकहरू आयोजना गरिन्छन् ।
उनले संसद्मा प्रतिपक्षी दलका नेताहरूले सोधेको प्रश्नको जवाफ समेत सरकारले नभई सत्तारुढ दलका सांसदहरूले दिने गरेको आरोप लगाइन् ।

उनले भनिन्, प्रश्नोत्तर कार्यक्रममा जवाफ नदिएर अपमान गर्ने मात्र होइन सभामुख महोदय प्रतिपक्षी दलका नेताहरूले सोधेका प्रश्नहरूको जवाफ सरकारले हैन पनि सत्तारुढ दलका सांसदहरूले दिनुहुन्छ । यस प्रकारको गतिविधि रोकिनुपर्छ । शक्ति पृथकीकरणको सिद्धान्तअनुसार सांसदले संसद्को अधिकार सदुपयोग गर्न पाउनुपर्छ ।

उनले सरकारले संसद्माथि गरिरहेको बलमिचाइँ रोकिनुपर्ने बताइन् ।