मन्त्रालयगत बजेट खर्चः परराष्ट्रले सर्वाधिक खर्च गर्दा उद्योगको ८ प्रतिशत मात्रै

काठमाडौं । चालू आर्थिक वर्ष २०८२/८३ को मध्यावधिसम्म आइपुग्दा मन्त्रालयगत खर्चको स्थिति निराशाजनक देखिएको छ । चालू आवको साउनदेखि पुस मसान्तसम्मको मन्त्रालयगत खर्च स्थिति हेर्दा परराष्ट्र मन्त्रालय मात्रै अब्बल देखिएको हो ।

चालू आवको बजेटको अर्धवार्षिक मूल्याङ्कन प्रतिवेदन अनुसार यस अवधिमा परराष्ट्र मन्त्रालयले विनियोजन गरेको कुल बजेटको ५५.८० प्रतिशत खर्च गरिसकेको छ । यस मन्त्रालयलाई कुल ९ अर्ब १ करोड ७१ लाख रुपैयाँ बजेट विनियोजन भएको थियो । जसमा कुल ५ अर्ब ३ करोड १७ लाख रुपैयाँ खर्च गरिसकेको छ ।

यस अवधिमा बजेट खर्च गर्नेमा उद्योग, वाणिज्य तथा आपूर्ति मन्त्रालय कमजोर देखिएको छ । यस मन्त्रालयले विनियोजित बजेटको ८.४८ प्रतिशत मात्रै खर्च गरेको छ । यस मन्त्रालयलाई ८ अर्ब ९५ करोड १९ लाख बजेट विनियोजन भएकोमा ७५ करोड ९६ लाख मात्रै खर्च भएको छ ।

चालू आवको दोस्रो त्रैमाससम्म शिक्षा, विज्ञान तथा प्रविधि मन्त्रालयले ४६ प्रतिशत बजेट खर्च गर्दा रक्षा मन्त्रालयले ४५ प्रतिशत बजेट खर्च गरेको छ । यस अवधिमा कृषि तथा पशुपन्छी विकास मन्त्रालय र गृह मन्त्रालयले ४२/४२ प्रतिशत बजेट खर्च गरेका छन् ।