कञ्चनपुर–१ मा ‘बिना मगर’ को घरदैलो अभियान तिब्र

धनगढी : कञ्चनपुर–१ बाट प्रतिनिधि सभा सदस्यका उम्मेदवार विना मगर यतिबेला चुनावी घरदैलो अभियानमा व्यस्त छिन्।

नेपाली कम्युनिस्ट पार्टीकी नेतृ मगरले निर्वाचन क्षेत्रका विभिन्न गाउँ–टोलमा पुगेर मतदातासँग प्रत्यक्ष भेटघाट गर्दै आफ्ना एजेन्डा प्रस्तुत गरिरहेकी छन्।

अघिल्लो निर्वाचनमा पराजय बेहोरेकी मगरले यसपटक मतदाताको साथ र विश्वास प्राप्त गर्ने दाबी गरेकी छन्। घरदैलोका क्रममा उनले विगतका अनुभवबाट सिक्दै विकास, रोजगारी, कृषि र आधारभूत पूर्वाधारलाई प्राथमिकतामा राखेर अघि बढ्ने प्रतिबद्धता जनाएकी छन्।

मतदातासँगको संवादमा उनले कञ्चनपुर–१ का दीर्घकालीन समस्या समाधानका लागि स्पष्ट योजना आवश्यक रहेको बताउँदै आफूलाई विजयी गराउन अनुरोध गरिरहेकी छन्।

स्थानीय बासिन्दाले पनि क्षेत्रको विकासका विषयमा आफ्ना माग र सुझाव प्रस्तुत गरिरहेका छन्।

निर्वाचन नजिकिँदै जाँदा कञ्चनपुर–१ मा चुनावी सरगर्मी बढ्दै गएको छ भने उम्मेदवारहरू घरदैलो र भेटघाट कार्यक्रममा सक्रिय देखिएका छन्।