रोल्पामा १० वर्षीय दलित बालक कुटिए

काठमाडौं । रोल्पाको गंगादेव गाउँपालिका–५ फुल्बासमा १० वर्षीय बालक खगेन्द्र बिकमाथि कुटपिट गरिएको घटना सार्वजनिक भएको छ।

स्थानीय भीमबहादुर खत्रीले सोही स्थानका खगेन्द्र बिकलाई “घरभित्र आएको” भन्दै ज्यान मार्ने धम्कीसमेत दिँदै घरभित्रै आक्रमण गरी कुटपिट गरेको आरोप लागेको छ।

घटनापछि गाउँलेहरूले थाहा पाएर बालकलाई उद्धार गरी बाहिर निकालेका थिए। गम्भीर अवस्थामा रहेका बालकलाई उपचारका लागि अस्पताल लैजाने क्रममा अर्का स्थानीय गोपाल बिकमाथि पनि धारिलो हतियार प्रयोग गरी आक्रमण गरिएको बताइएको छ। उक्त आक्रमणबाट गोपाल बिक गम्भीर घाइते भएका छन्।

स्थानीयवासीहरूले वडा कार्यालय, गाउँपालिका तथा जिल्ला प्रशासनलाई घटनाको सत्यतथ्य छानबिन गरी दोषीमाथि कडा कारबाही गर्न र पीडितलाई न्याय दिलाउन माग गरेका छन्।
घटनाले स्थानीय क्षेत्रमा त्रास र आक्रोश फैलिएको छ।