इस्लाम धर्मावलम्बीले आज ईद मनाउँदै

काठमाडौं । इस्लाम धर्मावलम्बीहरूको महान पर्व इद उल–फित्र आज देशभर हर्षोल्लासका साथ मनाइँदै छ।

एक महिनासम्मको पवित्र रमजान (रोजा) समाप्तिपछि आउने यो पर्व आत्मसंयम, त्याग र मानवताको सन्देश बोकेको महत्वपूर्ण अवसर मानिन्छ।

आज बिहानैदेखि देशका विभिन्न स्थानमा रहेका मस्जिद तथा ईदगाहहरूमा श्रद्धालुहरूको बाक्लो उपस्थिति देखिएको छ। मुस्लिम समुदायका मानिसहरूले विशेष नमाज अदा गर्दै शान्ति, समृद्धि र विश्वकल्याणको कामना गरेका छन्।

नमाजपछि एक–अर्कालाई अँगालो हाल्दै “ईद मुबारक” भन्दै शुभकामना आदान–प्रदान गरिएको छ, जसले आपसी सम्बन्धलाई अझ मजबुत बनाएको छ।

इदको अवसरमा परिवार, आफन्त र छिमेकीबीच मिठा परिकार साटासाट गर्ने परम्परा छ। विशेषगरी सेवैयाँ, खीरलगायतका परिकार तयार पारेर खुशी बाँड्ने चलनले पर्वलाई अझ मिठासपूर्ण बनाएको छ। यससँगै गरिब, विपन्न र असहायलाई ‘जकात’ तथा ‘फित्रा’ प्रदान गरेर सहयोग गर्ने परम्पराले सामाजिक समानता र मानवीयताको सन्देश प्रवाह गर्छ।

राष्ट्रपति, प्रधानमन्त्री लगायतका उच्च पदाधिकारीहरूले पनि यस पर्वको अवसरमा शुभकामना सन्देश दिँदै इदले नेपाली समाजमा सहिष्णुता, सद्भाव र राष्ट्रिय एकतालाई अझ सुदृढ बनाउने विश्वास व्यक्त गरेका छन्।

बहुसांस्कृतिक र बहुधार्मिक समाजका रूपमा रहेको नेपालमा
इद उल–फित्र जस्ता पर्वहरूले विविधताबीचको एकता र पारस्परिक सम्मानलाई अझ गहिरो बनाउँदै लगेका छन्।