मुलुकको संकट मोचन गर्न रुकुम आएको हुँ : प्रचण्ड

काठमाडौं । चितवनमा आफ्नो मताधिकार प्रयोग गरेलत्तै नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ हेलिकप्टरमार्फत रुकुम पूर्व पुगेका छन् । बिहीबार बिहान १०:४० बजे रुकुम ओर्लिएका उनले जिल्लाका विभिन्न मतदानस्थलको वस्तुस्थितिबारे जानकारी लिँदै मतदाताहरूसँग प्रत्यक्ष संवाद गरेका हुन् ।

सिस्ने गाउँपालिका-५ स्थित रुक्मेणी माध्यमिक विद्यालयमा रहेका तीनवटा मतदान केन्द्रको निरीक्षणका क्रममा प्रचण्डले देशको वर्तमान राजनीति जटिल मोडमा रहेको उल्लेख गरे । उनले भने, ‘मुलुक अहिले फेरि एउटा विषम् परिस्थितिबाट गुज्रिरहेको छ । इतिहास साक्षी छ, जब-जब देश संकटमा फस्छ, रुकुमले नै त्यसको समाधान र निकास दिने गरेको छ । आज फेरि देशलाई निकास दिनुछ र त्यो शान्तिको नयाँ लहर यही जिल्लाबाट सुरु हुनेछ ।’

विगतको सशस्त्र विद्रोह र शान्ति प्रक्रियाको प्रमुख केन्द्र रहेको रुकुमलाई प्रचण्डले पुनः एकपटक ‘राजनीतिक संकट मोचन’ को थलोका रूपमा चित्रण गरे । उनले रुकुमको ऐतिहासिक भूमिकाको चर्चा गर्दै यसपटक पनि यहाँका जनताले देशलाई नयाँ दिशा निर्देश गर्ने दाबी गरे । रुकुम पूर्वमा यसपटक प्रचण्डसहित ११ वटा राजनीतिक दल चुनावी प्रतिस्पर्धामा छन् ।